Koê berzê varıni. Zımıstanêde çetın, caêde ğerib. Çarhawêr pırê dışmeni, ya ki pırê "terorista". Serê nê koanê isızade çewres eskero hewl pawançênya welati keno... Nefes vırêndiye ebe mekanêde niyanên insana raştera fino dûri; filmê Nefeside guje guja helikoptera niya, tiyarê herbi koa, dew û dêşta bomba nêkenê, ebe hazara eskeri dormêre şeş-hawt xorta nêcênê! Eskerê Nefesi cara zûlım nêkeno, çıqa desta bêro hondê nêkişeno...
Nefes qe persnêkeno, qe merex nêkeno, gelo nê domani qêy vejiyêre koa, nê domani çı wazenê? Gelo na vist û ponc seriyo no herb qêy nêxelesino? Gelo welato ke xortanê xo niya sevinala bıdo kiştene, kam cıra çı xêr vineno? Nefes nê derheqade kher û lalo. Vatene Nefesi awa ke, hatani nıka çı biyo raşt biyo, naera tepya ki a raa raştera nêkume dûri.
 |
Waxtê şovenizmê gonıni êndi vêrdora, nıka guja şovenizmêde nermiya. Nê şovenizmê nermide militarizm kewto dılqê de "insani". Dışmenê xo caêde fasalneno, feqet nêkişeno! |
|
 |
 |
Militarizmê Nefesi dirê caade zaf zere tenık û rinerm aseno; dışmenê xuyê birındari nêkişeno, cat keno ke ê weşkero; gegane dışmeno xo dano qesêkerdene, fıkrê xo zobênabo ki goş nanore dışmenê xo ser. Xıremalê dınyayê! Kerdenê eskeriya Tırkiya koti, Nefes koti!
Vatena Nefesiya xoriye awa ke wa welat weşbo, zobêna se beno bıbo, heskena welat ebe kiştene tıp û tal bo. Ebe no qêyde Nefes çiyêde newe nêvano. Xora na çan seriyo koanê mara "Vırêndiye welat" nıvısiyaye nêbi? Na hêştaê sera xêrjiya nê qesera tawa ma çiyêde bin heşno, tawa mara çiyêde bin amo vatene? Feqet hatani nıka ma no propağande hêni zaf werdo ke, êndi cıra bime batxun; heq şênkero bıra Nefes! |
|
