Hemedinecad jûya xora nêkuno
Liderê Iran'i Mamud Hemedinecad hetêra fizanê newiya cerebneno, tersa dano Israil'i; hetêra ki diplomatanê ğeriba silayiyê Iran'i keno. İran Ameriqa û İsraili'rê biyo mışkulêde gıran. |
|
Cumhuriyetê İslamê İrani, herbê Iraqi'ra nat dewletanê rojağwayrê, xusisi ki Ameriqa û İsraili'rê biyo mışkulêde gıran. Xora Şaê İrani Rıza Pewlewi'ra tepya wertê Ameriqa û İran'i kokera xerepiya. Şerê İran û İraqi'de Ameriqa pışti dênê Saddam'i. Waxtê Mıhemed Xatemi'de zeke wertê Ameriqa û İran'i taê bibi nerm. Hurdmina heta ki jûbinirê mesajê germıni rışnênê, hurdmina heta ki jûbini hondê nêqarnênê. Feqet G.W Bush ke bi Sermiyanê Ameriqa û İran'deki Mamud Hemedinecad ke sermiyanênrê çinyawe, wertê nê hurdmina dewleta xaftıla bi xırab. G.W. Bush'i nêt kerdibi weş ke, İraqi'ra ra tepya berzo İran'i ser, nafa ki İran'i de şer bıkero. Bush'i be xo çand dolımi na derheqde eşkera qesêkerd. Qesêkerdene hetêde, Pentagon'i tewr planê hûcumê İran'i ki masa sero fiştibi ra. O taw Hemedinecad'i ki thal nêvındetêne, hetêra verba Ameriqa xoverdênê, hetêra ki tersi dênê İsrail'i. Roja ke Hemedinecad'i vake "İsrail gere serê hardara wedariyo" a rojera nat êndi çımê dınya çariyare İran'i.
|
Dewletê ke, cat kenê İran'i silaanê nükleerara dûri bıjêrê, ebe xo pêro wayirê silaanê nükleeranê! Xora İran'i ki qewete naera cêno. Ebe vatena İran'i, qêy İsrail'de silaê nükleeri bıbê, qêy İran'de çinêbê?
|
İran, taê eşkera taê dızdiya, kewtore silaanê nükleera dıme. Çawo ke qesêbeno, İran qalê heqa xûya enerjiyê nükleeri keno. Feqet dewletê bini zanê ke İran ebe na qeyde silaanê nükleera, ma vajime, bomba atome vırazeno. Dewletê rojağway, xusisi ki Ameriqa û İsrail, cat kenê ke vırêndiyere İran'i bıjêrê wa İran wayirê silaanê nükleera nêbo. Esas na mesela İsrail zaf qife cêno; çıke fizê İrani'yê ke nükleer serık şanino cı, êndi resenê hardê İsrail'i. Yanê İsrail êndi kewto menzilê İran'i. Coka İsrail'i ki hondê teqeze keno ke gamê avê vırêndiyere İran'i bıjêro. Feqet nafa mışkulêde bin vejino: Nê dewletê ke, cat kenê İran'i silaanê nükleerara dûri bıjêrê, ebe xo pêro wayirê silaanê nükleeranê! Xora İran'i ki qewete naera cêno. Ebe vatena İran'i, qêy İsrail'de silaê nükleeri bıbê, qêy İran'de çinêbê? Na persa İran'i hondê ki bêbınge niya û xora na derheqde dewletê dınya têsare nêkenê. Taê dewletê Awrupa siyasetêde tayina nerm kudênenê; Urız, Çin û dewletê bini ki mêlê İran'i kenê.
 |
İran tevera helana dano xo, lê feqet xozerede girino. Cêni û talebê verba bındestiye şerêde gıran danê. Heqê insana bınê nıngaderê; dardekerdene û kiştene bêhemda; hepısxanê tengejiyayê. Hemedinecad tevera çıqa jihatiyo, zeredeki hondê zalımo.
|
|
 |
|
Gelo na derheqde pozisyonê Tırkiya çıko? Taê vanê ke, Tırkiya İsraili'ra kuna dûri û İran'de bena nezdi. Xora na dirê seriyo wertê Tırkiya û İsrail'i hondê rınd niyo. Sebebê na dûri kewtene Bısılmanêni û Cûhıdêni têyna niya. Tırkiya gorê seranê veri, nê sera tayina gıraniye dana diplomasi, wertê xo û dewletanê dormê xo kena rınd. Meselê ke verdera caê Tırkiya kerdibi teng, na waxta jû be jû benê safi, ya ki axri sero êno qesêkerdene. Tırkiya wertê dewletanê Bısılmanade tayina vırêndiye ser êna. Eke niya beno, bıwazê nêwazê, Tırkiya û İsrail'i mejbur ênê têdûşt. Feqet heto binra ki, Ameriqa û dewletê rojağway nezdibiyayêna Tırkiya û İrani'de xırabiyê nêvinênê. Gorê taê analista, Tırkiya gelê waxto wertê Ameriqa û İrani'de qasıdêni kena.
|
